Dalkanews Videos

Madaxweynaha Dowladda Eritrea Isaias Afewerki ayaa si kulul ugu eedeeyay dowladaha deriska la ah soomaaliya, gaar ahaan dalalka Kenya, Jabuuti iyo Itoobiya in ay dab ku sii shidayaan qalalaasaha ka taagan Soomaaliya.

Isaias Afewerki ayaa sheegay in dowladaha jaarka la ah soomaaliya ay fara gelin qaawan ku hayaan dalka ay colaaduhu la dageen ee soomaaliya, isagoo u jeediyay in ay faraha kala baxaan oo soomaalida u daayaan masiirkooda.

Madaxweyne Eritrea Isaias Afewerki oo la hadlayay wakaalada Wararka ee Reuters ayaa sheegay in dowladda Mareykanka ay mas'uulka ka tahay dhibaatada ka jirta soomaaliya, isagoo sheegay in ay ugu soo gambaneyso hal ku dhigyo qalafsan oo ah in ay joogto argagixiso iyo Al-Qaacida.

Dowladda Jabuuti ayaa si kulul u beenisey eedeymaha ka soo yeeray Erirea, waxaana ay sheegtay Jabuuti in Wadanka Erirea ay iyagu yihiin kuwa taageera kooxaha mayalka adag ee duminaya qaranimada Soomaaliya isla markaasna dagaalka kula jira dowladda sharciga ah ee Soomaaliya.

"Ma ahan wax lala yaabo in Eritarea ay wax dhaleeceyso, waa dhaqanka hogaanka wadankaasi, waxaana lagu maldahayaan gacmaha uu hogganka Eritarea kula jiro arrimaha Soomaaliya oo la wada ogyahay" ayuu yiri Safiirka Jabuuti u fadhiya Mareykanka.

QM, ayaa waxay dowladda Eritrea ku eedeysay in taageero dhaqaale oo isugu jirta hub iyo Cash siiso kooxaha mayalka adag ee Soomaaliya ka dagaallama, iyadoo dhaqaalahaasina lagu sheegay ilaa Nus Malyuun dollar.

Dowladda Eritrea ayaa dhowaan lagu eedeeyay in ay hubeyneyso kooxaha mucaaradka ku ah dowladda soomaaliya, isla markaana ay bar baarineyso, waxaana golaha amaanka qaramada midoobey iyo Mareykankaba u jeediyeen digniin culus.

Laakiin Dowladda Britain ayaa ku soo biirtay dadaalka loogu jiro in Eritrea la saaro cunaqabateyn hadii ay joojin weyso fara gelinta iyo taageerada kooxaha mucaaradka.
Eritrea ayaa had iyo jeer eedeyntaas beenisa,iyadoo ku tilmaantay kuwo aan sal iyo raad toona laheyn.

Dalkanews.com Muqdisho